Umhverfisdagurinn var í dag, miðvikudag 25. apríl. Umhverfisnefnd skólans, sem skipuð er fulltrúum frá öllum nemendastigum, foreldrum, stjórnendum og ýmsum umhverfissinnum, hafði undirbúið daginn vel og sett upp dagskrá til þess að árangurinn yrði sem mestur. Nemendur tíndu upp alls kyns rusl við skólann og í nágrenni hans, rökuðu, mokuðu, söfnuðu saman og flokkuðu. M.a. voru hengdar upp snúrur fyrir skólastigin, þar sem setja mátti rusl og ýta þannig undir kapp í brjóstum nemenda! Tókst dagurinn með ágætum, enda skipulag með besta móti og veðrið ágætt. Eins og meðfylgjandi myndir sýna, var framlag nemenda með ýmsum hætti!

Undanfarna viku hefur skólahreysti 2018 farið fram í fyrsta sinn í nýja íþróttasalnum. Nemendur hafa þreytt ýmsar þrautir, sem hafa verið aðlagaðar skólastigunum. Þá hafa einnig bæst við nýjar þrautir hjá hugmyndaríkum íþróttakennurum! Að vanda skorti ekkert á áhuga nemenda, sem lögðu sig alla fram. Í dag, föstudag 20. apríl, var svo komið að því að verðlauna mannskapinn. Meðfylgjandi mynd sýnir drengi af yngsta stigi taka kampakátir við sínum verðlaunum.

Dagurinn í dag var einn af þessum stóru dögum í sögu Klettaskóla.  Í morgun voru  formlega afhent nemendum og starfsfólki skólans til notkunar nýr íþróttasalur og sundlaugar.  Því var mikið um dýrðir, borgarstjóri og fleiri fyrirmenn borgarinnar komu í heimsókn, fluttar voru hástemmdar ræður, sýnd íþróttatriði bæði í sal og sundlaug, skólakórinn söng nokkur lög og loks var boðið upp á veitingar.  Sundsprettir borgarstjóra í nýrri sundlaug vöktu verðskuldaða athygli, enda þreytti hann sundið í hópi sundfráustu nemenda skólans!  Ekki þarf að fjölyrða um þá byltingu í kennslurými og  kennsluháttum, sem þessi nýja aðstaða býður uppá!  Meðfylgjandi mynd sýnir borgarstjóra hvíla sig að loknu sundi í heita pottinum ásamt nokkrum „sprettfiskum“ úr hópi nemenda.  Fleiri myndir má finna í myndasafni.  Þá má sjá nánari umfjöllun og myndir á heimasíðu borgarinnar og á mbl.is.

Páskafrí hefst nk. mánudag, 26. mars, og því var seinasti skóladagur fyrir frí í dag. Að venju voru starfsmenn sem nemendur meðvitaðir um væntanlegt frí, a.m.k. var andinn í skólanum óvenju léttur og tilhlökkun í lofti! Skólastarf hefst aftur þriðjudaginn 3. apríl samkvæmt stundaskrá. Skólastjórnendur og starfsmenn skólans óska nemendum sínum og aðstandendum þeirra gleðilegs páskafrís! Á meðfylgjandi mynd eru strákarnir úr 9. bekk að gera sig klára fyrir seinasta tölvutímann fyrir páska, glaðir og reifir ….. eins og alltaf!

Í morgun, mánudag 26. febrúar, lauk úrslitakeppninni í kúluspili, en kappið hefur staðið yfir í íþróttasal skólans undanfarna daga. Kúluspilið er vinsælt spil og hentar sérstaklega nemendum með skerta hreyfifærni. Íþróttakennarar skólans hafa sem oft áður haft veg og vanda af þessari tilbreytingu í skólastarfinu.  Eins og stundum áður komu úrslit á óvart, en nýliðarnir í keppninni, nemendur í 1. bekk, sigruðu að þessu sinni. Á meðfylgjandi mynd hafa 3 stigahæstu liðin fengið verðlaun fyrir góða frammistöðu og bíða þess, misjafnlega þolinmóð, að myndasmiður smelli af nokkrum myndum!